مش فارقة دلوقت

ساعات كتير بنكون ماشين في طريق على اساس ان احنا ماشين في اتجاه معين ونتفاجئ اننا وصلنا لمكان تاني خالص عمرنا مافكرنا اساسا فيه

ممكن المكان الي احنا نوصل ليه يكون احسن بكتير من الي اتمنناه وممكن يكون اسوء بس اكيد مدام مش احنا الي اخترناه وربنا هدانا ليه حتى لو كان اسوء من وجهة نظرنا فهو افضل بكتير

ساعات كتير بنحلم ونحلم ونصحى من الحلم نحاول نحققه ونفضل نحاول لحد مانقرب منه قوي ويبقى خلاص بينا وبينه خطوة واحده نرجع نمشي بعيد ونسيبه علشان بنحس ان الحلم دا ماينفعش يكون واقع حتى لو اتحقق هو مش مناسب لينا الاحسن نبعد ونبعد قوي كمان

اكيد هنتوجع كل مانفتكر الحلم الي سيبناه ومشينا بس وجع ساعه احسن من وجع كلساعه

ساعات بنكون تايهين مش عارفين احنا عايزين ايه وفي وسط التوهة دي نتفاجئ اننا تاهت جوانا حاجات كتير وتاهت معاهم كمان نفسنا

لو وقفنا لحظه ورجعنا ندور عليها بنلاقيها وبنلاقي نفسنا مش علشان احنا دورنا عليها لكن علشان بقى لينا هدف حتى ولو كان ان احنا نلاقيها

وساعات بيكون لينا هدف وشايفينه من بعيد وبنحاول نوصله وفي طريقنا ليه بنتنازل عن حاجات في نظرنا صغيرة ومش مهمة وفي النهاية لما نوصل نتفاجئ ان احنا خسرنا حاجات كتير حتى نفسنا خسرناها معاهم والهدف الي وصلناله مش بيعوضنا ولا اهم من الي خسرناه

مافيش حد بياخد كل حاجه وعلشان ناخد حاجه لازم نتنازل عن حاجه مقابلها المهم ان احنا منخسرش حاجه كبيرة مع الحاجه الصغيرة الي بنتنازل عنها علشان حاجه ماتستهلش نضحي بحاجه علشانها

ساعات بتضيع مننا حاجه كبيرة في حياتنا ونفضل نبكي كتير عليها مع ان بكاءنا دا مش هيرجعها

لو رضينا وبصينا حوالينا يمكن نلاقي حاجه ممكن تكون صغيرة بس اجمل بكتير ودموعنا الي مكنتش مخليانا نشوفها

ساعات بنشوف بإحساسنا في الضلمه الي مش بنشوفه بعنينا في النور

وساعات احساسنا بيكدب وبنحتاج بصيص النور علشان نعرف نشوف قدامنا

مش كل اللي اتربينا عليه صح

ومش كل التغيير مطلوب

مش معنى الفشل مرة واتنين وتلاته

ان احنا فشلنا

مجرد النجاح في الفشل دا في حد ذاته نجاح

وساعات لما بنفشل بنتعلم حاجات ولا عمرنا كنا هنعرفها لو نجحنا

هبني اللهم الصبر والقدرة لأرضى بما ليس منه بد وهبني اللهم الشجاعة والقوة لأغير ماتقوى على تغييره يد وهبني اللهم السداد والحكمة لأميز بين هذا وذاك