سكيزوفرينيا الموقف

اتفقنا من الاول خالص اننا مش بنتكلم علي السكيزوفرينا من الناحيه الطبيه ولا من ناحيه علم النفس لان السكيزوفرينيا اللي هنا

مش اللي في كتب الطب و لا حاجة لا دي السكيزوفرينيا اللي موجوده جوه كتير مننا وعشان محدش يقول ايه الكلام العبيط ده ولا اللي ملوش اساس من الصحه

انا بتكلم عن نفسي وعن فكرتي اللي بحاول اوصلها في المدونه مش بشرح حاجة موجوده و اعظم علماء النفس بهدلوها تفسير ودراسه

اوك؟؟

انا المرادي عاوز اتكلم عن سكيزوفرينيا الموقف

واحد هيطلع يسألني يعني ايه ؟؟

اقولك انا يعني ايه

سكيزوفرينيا الموقف انا بوصف بيها المواقف اللي بتحصل تستلزم انك تخرج من جواك الشخص التاني اللي اتكلمنا عنه

وتخليه يتناقش معاك في الموقف اللي حصل بس ساعه الموقف نفسه مش بعد كده

هيرجع نفس الشخص يسألني يعني ايه برضه ؟

هحاول اوضحلك

مش ساعات انت بتبقي مع صحابك ولا ماشي في الشارع ويحصل موقف معين يستلزم انك تقف عنده شويه ولو ثواني و تنح وتفكر و تكمل مشي وانت بتسال نفسك اسئله و بتحاول تلاقيلها اجابه؟؟

اه بيحصل

عليك نور اهو هو ده اللي انا اقصده بس بدل م بتمشي و تفكر وتسأل روحك اسئله عاوز تلاقيلها اجابه

بتسأل حبيبك و نصك التاني اللي دايما معاك منين متروح و تاخد وتدي معاه و الناس تفتكرك مجنون وانت ماشي بتكلم روحك

و تلاقي واحد بيبصلك كده و يحرك ايديه جنب ودنه في اتجاه عقارب الساعه و يقولك اصحاب العقول في راحه

برضه لسه مش فاهم ؟؟

ان شاء الله اعدمك لو فهمت حاجة !

طيب بص يا عم هديلك مثال صوغير يمكن يوضح الصوره برغم انه ممكن يكون عبيط بس لعل وعسي الصوره تقربلك يا سيدي

اتفضل قول

افرض انك ماشي في الشارع ولقيت قطه صغيره وصعبت عليك و عاوز تخدها عشان شكلها صعبان عليك وهي في عز البرد وجعانه

و تروح عشان تمد ايديك وتمسكها

تلاقي حبيبك اللي بنتكلم عنه طلعلك قدامك كده مع الموسيقي التصويريه اللي في البلوج ويقولك

انت بتعمل ايه ها ؟؟ انت اتجننت

ترد وتقوله ايه هاخد القطه اربيها واشوفلها مكان تنام فيه

يقولك: ت ــايه؟؟!! تربيها انت قادر تهتم باوضتك ولا بهدومك وترتيبها عشان تربي قطه

وبعدين مامتك ولا باباك هيرضي انك تدخل القطه دي البيت و انت جايبها من الشارع انت مش عامل حساب الموضوع ده

تروح انت متراجع عن فكرتك و موطي راسك وتقوله عندك حق و تسيب القطه وتبعد وبترميها بنظره حزن وشفقه

ويختفي الشخص اللي ظهر تاني مصحوب بنفس الموسيقي التصويريه اللي في البلوج

و تكمل طريقك و انت جواك مقتنع ان اللي عملته ده صح لان فعلا لا اهلك هيرضوا انك تاخد القطه ولا انت اصلا هتقدر ترعاها لانك مش عارف تهتم بحاجاتك بس بالرغم من ده زعلان علي حال القطه

ها فهمت كده انا عاوز اوصل ايه ؟؟؟

ممممممممممم يعني شويه 

اللي عاوز اوصله ان مواقف كتير بنتعرضلها بيبقي جوانا مشاعر مكبوته وكلام كتير واحاسيس اكتر و كل اللي غالب علينا الوقت ده هو التساؤل والسكوت

بنسأل روحنا اسئله و بندور علي اجابات ليها و بناقش روحنا في احداث او بنفكر نتصرف ازاي لكن ساكتين مش قادرين نبوح بده الا مع نفسنا ..وساعات بنبقي عاوزين ناخد قرار في وقت سريع مجرد دقايق و بنتكلم مع نفسنا و نفكر عشان ناخد القرار ده

ففي وقت صغير جدا ثواني او دقايق بيخرج الشخص التاني اللي جوانا و يحاورنا و يناقشنا في القرار او الموضوع

و هنا ده اللي بقصده بسكيزوفرينا الموقف

ياتري اللي ماسكني تساؤل من اول البوست فهم ولا لسه ؟؟؟

و ياتري بقي حصلت معاكم سكيزوفرينا الموقف دي قبل كده ولا لسه ؟؟